Беларуская паэзія

Вершы на беларускай мове



Верш Ізноў мне не спіцца

Ізноў мне не спіцца…
Што гэта такое?
Душа-шаляніца
Дзяўбе неспакоем.

Сляпая ж, здаецца,
Ды глуханямая,
А беднае сэрца
Назолай праймае.

Трымаецца строга
Няўмольнай суддзёю
І голасам Бога
Гаворыць са мною:

Ўпікае за штосьці –
І зноў паглядае:
Якая я ў злосці,
У страсці якая.

Ускрыўшы рашуча
Мае недахопы,
Належнаму вучыць
На мове Эзопа.

І што ні пытанне,
Пачуцці турбуе:
Ці маю каханне?
Ці светла жыву я?

Ці там я і тое
Збіраю багацце –
Істотай святою –
Жанчынай і маці?

Ці сэрцам сваім
Саграваю кагосьці,
Спяваючы гімн
Мілаце й прыгажосці?

І гэтак, дурніца,
Амаль да світання…
Заснуць бы… Не спіцца…
Няма ратавання…

14.03.2012

1 Star2 Stars3 Stars4 Stars5 Stars (1 votes, average: 5,00 out of 5)

Верш Ізноў мне не спіцца - Таццяна Дзям'янава