Беларуская паэзія

Вершы на беларускай мове



Верш БАЛАДА АЛЕСЯ ЕМЕЛЬЯНАВА

(20.03.1952-6.10.2005)

У пачцы цыгарэты, як патроны,
Якімі забіваеш сам сябе,
Бо немагчыма жыць і быць штодзённа
Спакойным у краіне, дзе ў журбе
Далёкіх продкаў курганы сівыя
І рэшткі замкаў у палын-траве,
Дзе вецер, нібы воўк галодны, вые…

І тое, што ўсё ж Беларусь жыве
На пляцах чутна, на якіх збірацца
Няма дазволу, ды народ прыйшоў,
Які не будзе пра дазвол пытацца
На веру, на надзею, на любоў…

І любіш ты глядзець, як бусел кружыць
Над хатамі, дзе Беларусь жыве
І сонца ў небе залатою ружай
У будучынь з мінулага плыве
І не знікае, бо яно ад Бога,
Як Беларусь ад Бога, дзе ёсць нам
Для кожнага, як для цябе, дарога
У беларускі самы белы Храм…

30.06.2011

1 Star2 Stars3 Stars4 Stars5 Stars (No Ratings Yet)
Loading...

Верш БАЛАДА АЛЕСЯ ЕМЕЛЬЯНАВА - Віктар Шніп