Беларуская паэзія

Вершы на беларускай мове






Верш Рамеснік! Ён хацеў быць мастаком!

Рамеснік! Ён хацеў быць мастаком!..
Ён гліну мяў, ён спаць не мог начамі,
Ён не вылазіў з нізенькай ганчарні
I хлеб мачаў у глечык з малаком.

Вятры змяталі лісце з бальшака,
Бярозак моклі голыя каленькі,
Ад прахалоды ўздрыгвала рака,
I пад зямлёй спляталася карэнне.

Рабін чырвоных палымнеў пажар,
Халодным золатам ірдзелі пожні.
Ва ўсім было жыццё, была душа,
I гэта ён адчуў бездапаможна.

Ён чарапкі раструшчыў малатком,
Згубіўшы рэшткі веры, моцы, волі…
Рамеснік! Ён хацеў быць мастаком.
Ды разумеў, што ім не быць ніколі.

1 Star2 Stars3 Stars4 Stars5 Stars (1 votes, average: 5,00 out of 5)

Верш Рамеснік! Ён хацеў быць мастаком! - Навум Гальпяровіч