Беларуская паэзія

Вершы на беларускай мове



Верш Балада вернасці

Да вас бяжыць знаёмая дарога,
Да вас вязу няпэўны свой настрой.
А вы адкуль з такою дабрынёй
I да мяне, і да майго малога?

Лаўлю ласкавы поціск вашых рук,
Што загрубелі ад работы трошкі.
А ці вядома пачуццё разлук
Вам, неразлучным аж да самай дошкі?

Адкуль у вас пагэтулькі святла?..
Ды схамянуся, тут не трэба словы.
Ў маім сяле яшчэ на паўсяла
Жывуць з вайной заручаныя ўдовы.

I па начах яшчэ ім страшна спаць,
Гартаць жыцця пражытага старонкі.
I незваротным промнем зіхацяць
На пальцах скамянелыя пярсцёнкі.

1 Star2 Stars3 Stars4 Stars5 Stars (1 votes, average: 5,00 out of 5)

Верш Балада вернасці - Яўгенія Янішчыц