Беларуская паэзія

Вершы на беларускай мове



Верш – Што ж ты, радасць, такою зрабілася?

– Што ж ты, радасць, такою зрабілася?
Не забавіш, не ўвесяліш?

– Хм, сама на мяне і забылася:
Смутна ходзіш, трывожна спіш.

– Але ў чым вінавата я, светлая,
Дзе памылка мая і віна?

– Ты зрабілася сэрцам няветлая,
Паспытаўшы кахання віна.

– Пачакай, ты ж сама частавала,
Прымушаючы вочы яснець!

– Але я да краёў налівала
Не затым, каб краналіся ледзь.

– Я баялася п’янай напіцца,
Я страшылася келіха дна.

– Добра, хопіць, ідзі весяліцца,
Кінеш вокам – і ты не адна.

– Не адна! Колькі шчасця багата!
Ды з яго забірае на плач!

– Ну дык ведай: не вернеш ты брата.
Не табе прызначаўся. Прабач.

1 Star2 Stars3 Stars4 Stars5 Stars (1 votes, average: 5,00 out of 5)

Верш – Што ж ты, радасць, такою зрабілася? - Вольга Ласаева