Беларуская паэзія

Вершы на беларускай мове



Верш Беларусь стаіць на курганах

Прысыпаныя мёртвым пылам пліты,
Пазалачаных слоў не разабраць.
Тут новыя магілы – не забытых,
Магіл забытых век не адшукаць.

Нам не знайсці, дзе пахаваны Будны,
Мы таленты суседзям раздаём.
Нам Беларусі шлях жыцця пакутны
Пазнаць па кнігах, чытаных агнём.

Ды кнігі, як злачынцы, пад замкамі
За праўду, што не здрадзіла ў вяках.
Гісторыю пісалі курганамі,
Пазнаю Беларусь па курганах.

Прысыпаныя мёртвым пылам пліты
Патрэскаюць ад лютых маразоў.
Успомнім непрызнаных і забытых,
Ім аддадзім як доўг сваю любоў.

I курганам сівым імёны вернем,
Імёнамі асветліцца наш шлях.
Як дуб за жвір трымаецца карэннем,
Так Беларусь стаіць на курганах.

1 Star2 Stars3 Stars4 Stars5 Stars (1 votes, average: 5,00 out of 5)

Верш Беларусь стаіць на курганах - Віктар Шніп