Беларуская паэзія

Вершы на беларускай мове



Верш Маладосць была, ці прыснілася?

Маладосць была, ці прыснілася?

Глядзіць бабуля на закаханых,
Такіх прывабных, модна прыбраных.
І бачыць сябе ў іх, ранейшую,
Красуню вясковую першую.

Маладзенькай, з яснымі вочкамі
На спатканні бегала ночкамі,
Дзявоцтва пара бесклапотная,
Шчаслівая ды незваротная.

З любым у велюме абвянчалася.
Працы цяжкае не цуралася.
І дзеткі-парасткі новыя
Раслі, ёй на радасць, здаровыя.

Колькі чакала яшчэ дарог,
Ды старасць спадарыняй на парог,
Не думала ў справах пра гэта-
Журавы панеслі вясну і лета.

Абарванае лісце вятрамі
Падае-сцелецца пад нагамі,
Іней срабрысты асеў на скронях,
Моцы ранейшай няма ў далонях.

Хапіла ў жыцці дабра і ліха,
І разважае бабуля ціха:
Так доўга жыву, што стамілася,
Маладосць была ці прыснілася?

1999 г.

1 Star2 Stars3 Stars4 Stars5 Stars (1 votes, average: 5,00 out of 5)

Верш Маладосць была, ці прыснілася? - Ніна Кавальчук