Беларуская паэзія

Вершы на беларускай мове



Верш Месяц люты



Вясёлы месяц люты,
Мяцеліцай раскуты, –
Шумі вятрамі, грай!
Вятры пабралі лютні,
Імчаць у свет бязлюдны.
Праводзіны?
Адходзіны?
Зіме?
Гэй, пачынай!
Давай!
Давай!

Ах, ах, ды ў гэтым месяцы
Яшчэ забіты весніцы,
Марозам прымарожана,
Прымружана
Шчэ лужына
Завейлівым сняжком.

Гудзе вятрамі вуліца,
Як бубен дом.
Мяцеліца пасцелецца
Ад рання да цямна.
Апоўначы насмеліцца
Адліга –
Месяц крыгай
Да самага відна.
А зорка – во свавольніца! –
Пад раніцу расколецца
Аб шыбіну акна.

– Скажыце! Навіна!

Кажыце не кажыце,
Ідзе вясна!



1 Star2 Stars3 Stars4 Stars5 Stars (No Ratings Yet)
Loading...

Верш Месяц люты - Міхась Стральцоў